إعـــــــلان

Collapse
No announcement yet.

مشكلتنا مع الاعياد و العطل الرسمية

Collapse
X
  • Filter
  • الوقت
  • Show
Clear All
new posts

  • مشكلتنا مع الاعياد و العطل الرسمية

    مشكلتنا مع الاعياد و العطل الرسمية

    العمل في صناعة النفط و الغاز له مميزيات عديدة و سلبيات مساوية في المقدار و مضادة في الاتجاه
    واحدة من المشاكل الموثقة و المدروسة من قبل الصناعة هي المشاكل النفسية الناجمة عن بعد مواقع العمل عن المدنية والمخاطر العالية و مشقة و طول فترات الورديات و البعد عن الحياة الاجتماعية مما يعرض العاملين لفترات من الاكتئاب و تقلب الامزجة و اعراض نفسية اخرى مختلفة من ضمنها التوحم الزكوري
    – نعم التوحم اجاركم الله – يعني الواحد يكون قاعد في نص الخلا و فوقه شمس زمهرير فيبداء يسرح و يتوحم بي ببسي بارد – بطيخة مريخابية – صحن فول بالجبنة و زيت السمسم – خضرة والتقلية تشفشف في وشها – و هكزا دواليك
    مرة الحكاية دي زادت عند واحد اخونا فمشى لي الخواجة دكتور الموقع (دكتور و خواجة = علاج باتع و ناجع) . اخونا قعد في الكرسي وبدأ يحكي الاعراض بالتفصيل.... بس صاحبنا بعد خلص اكتشف انو الدكتورسرحان بعييييد و ما سمع خالص....
    قال ليهو: هيييي دكتر.....واتس اب؟؟ الخواجة اتنفض وعاين ليهو و قال: سورى مايت ... اي واس دريمن اوف فش اند شبس اند باريل اوف بير!!! الخواجة طلعت حالتو اصعب مننا .... ورجع اخونا بسفنجات حنين ....

    من اول ما بديت اشتغل في المجال ده و انا اعاني من حظي العاثر... مرات كتيرة جدول شغلي يقع في الاعياد و الاجازات و لما تكون في مناسبات سعيدة و حفلات و برامج ملهلبة...

    اول عيد نقضيهو في الخلا كان قبل سنوات عدة (الزمن داك كنا شباب. الشعر كان سبيبي كثيف و الواحد كان طويل القامة وسيم ورشيق وعضلات تبش.. يعني باختصار اميتاب باتشان مضروب في توم كروز)

    وصلنا الشغل من الكامب كالعادة بعد الفجر—شربنا الشاي واتلمينا نحن الموظفين المسلمين و كنا 5 و طلبنا من السواق يودينا اقرب مصلى لي صلاة العيد – نظام الشباب عندهم ايمانيات عالية و كده!!!.
    الراجل داس بينا بين الجبال دوس من لا يخشى الفقر (الحمدلله ما في رادارت في جبال الخلا) و ودانا مصلى في منطقة مقطوعة اسمها الغليلة
    المصلى عبارة عن ارض مايلة تحت سفح جبل وجنب هاوية و كان فيها زي 10 من اخوانا العمانين من اهل المنطقة – بعد 5 دقايق جات عربية لانكروزر بكس قديمة و وقفت قدام المصلى
    السواق نزل و فتح كبوت العربية و طلع البطارية و خطاها فوق الصندوق – من الجهة التانية نزل امام مصري لابس لبس الازهر و شايل مكرفون من النوع بتاع المظاهرات و طلع في صندوق العربية
    الجماعة و صلو سلك بالبطارية و طرف السلك بالمكرفون و بدأت الصلاة و خطبة العيد
    الارض المايلة جهجهتنا شديد و عملت لينا دوار بحر – يعني تقعد تحس روحك حتنكفي بالجنبة – تسجد تلاقي الشاي الفي بطنك حا يطلع من نخريك
    تقيف – تحس بي راسك خفيف و تمسك في الجنبك علشان ما تقع
    المهم خلصنا و سلمنا على الجماعة و الامام المصري اداني حضنة قوية و قال لي وعيونه ترقرق بالدموع – يا ابني... احنا أيه الجابنا هنا؟؟؟

    المشكلة الاكبر كانت بي المساء – ربنا ابتلانا بي اصحاب حاقدين عملو لينا نفسيات: الجماعة بقو يضربو لينا تلفونات من المعايدة و من الحفلات و الرحلات الفي البندر و يرفعو الموبايل علشان نسمع الاصوات الخلفية من ضحكات وونسات و اصوات الاهل و الاحباب والموسيقى و الاغاني --- ونحن نعاني ---- طبعا الحمدلله الزمن داك ما كان في 3جي و مسجات ملتميديا لأنو الجماعة ديل كان عزبونا و نقلو الاحداث بالفيديو!!!ا

    البزيد الرملة هواء (مصطلح صحراوى له نفس معنى يزيد الطين بلة) و البعمل لينا نفسيات انو اول ما نطلع اجازة و نمشي لي اهلنا تنعدم مظاهر البهجة و المناسبات السعيدة و تبداء المناسبات التعيسة من مرض المعارف و الاهل و الوفيات والعزاءات .....
    الكويس في الموضوع انو مع مرور الايام و بحمدلله الامورتبداء تتحسن – مش لأنو الوضع بيتحسن – لكن بيحصل تبلد في الاحاسيس و تليف في الفؤاد مما يؤدي الى تخدير موضعي مزمن للاعضاء المختصة بالشعور فتصبح الايام زي بعد و يفقد الواحد الاحساس بي الزمن.......وسلامتكم

  • #2
    رد: مشكلتنا مع الاعياد و العطل الرسمية

    يا أيمن عملت لينا حالة نفسية معاكم ونحن كنا فاكرين نفسنا هنا في العاصمة في السجن الكبير ونحسدكم على العمل في الهواء الطلق والإستماع بالعمل في الحقل ولكنك تنقل لنا صورة مغايرة ولا نملك إلا أن ندعو الله ليسهل لكم أموركم ودعني أقترح عليكم مبدئيا الدخول في برنامج قراية مكثفة طالما أنكم في هذا الجو الخانق وخاصة فبما لو بدأتم مشروعا لحفظ كتاب الله الكريم فتلك أنسب فرصة لحفظه بعيدا عن ضوضاء المدينة وإلتزاماتها وإرتباطاتها الكثيرة وبإذن الله في مقبل الأيام سنفكر معكم في كيفية عمل برامج خاصة لكم تتفق وطبيعة عملكم وربنا يحفظكم من كل سوء .. آمين
    اللهم استرنا فوق الأرض وتحت الأرض ويوم العرض .. آمين

    Comment


    • #3
      رد: مشكلتنا مع الاعياد و العطل الرسمية

      يا خوي يا موني عرس وعرس بسرعه شديده جدا ،، حتى إذا رجعت لمسقط تجد عروسك منتظراك وإذا عدت لعملك تتصل بك وتخفف عليك فأنا عندما جئت البلد دي أول شي ما كان في دشات وتلفزيون عمان تنتهي برامجه الساعة 12 مساءا وإش بتاعت نهاية الإرسال عادي الواحد بحضرها إمكن يغيروا رأيهم وإنت تعرف مافي سوداني بعرف ينوم بدري وما كان عندي أصدقاء وكنت ساكن في سكن موظفي الشركة وعندما كنت أطلع أدور بالعربية في الشارع أشعر أني أنا الوحيد في الشارع فبقيت أدور في السكن برجولي وإذا شافني واحد من الموظفين إفتكرني حرامي ولمن نقترب من بعض يعرفني ( وفي يوم واحد ضابط قال لي لماذا السودانيين بساهروا كثير وقال إنو بعد الساعة 11 مساء بكون في الشارع 3 هم الشرطة والسودانيين والكلاب ) وبالمناسبة هذا كان في مسقط العاصمة ،، فأحمد ألله ألف مرة ففي زمنكم التلفزيون يعمل 24 ساعة ومليون قناة ( وفيها الدينية يا عمار ماتستعجل ) وموبايلات والنت كمان ،، فإنتو غير يا أخوي بس نرجع لموضوعنا وعرس وبالمناسبة أنت مازلت صغير بس ما تسمع صغير وتقول بعرس بعد 10 سنوات فعندك على أقصى تقدير 15 يوم وتدبر حالك وطبعا ألذ شي لو ربنا رزقكم بأطفال فيادوب حياتك بقت أكثر من حلوة ،، وبالمناسبة أنا عندما تزوجت تغيرت حياتي مش 180 درجة تغيرت 180 مليون ردجة وكيف أنا ماعارف وانت مهندس فاحسبها متل ما بدك ،، فإعتبرني أخوك الكبير وأسمع نصيحتي هذه ،، ، وأسأل الله أن يمتعك بالصحة والعافية ويرد غرتك الفي غربتك ،، ودمت عزيزي موني ،، أبو بهلول .
      Last edited by عصام نوح; 14th October 2009, 05:17 PM.
      سترك وعفوك ورضاك يا رب العالمين

      Comment


      • #4
        رد: مشكلتنا مع الاعياد و العطل الرسمية

        المشاركة الأصلية كتبت بواسطة عصام نوح مشاهدة المشاركة
        وبالمناسبة أنت مازلت صغير


        التضليل ده شنو يا عصام؟؟؟؟؟
        مَشَيْنَاهَا خُطَىً كُتِبَتْ عَلَيْنَا وَمَنْ كُتِبَتْ عَلَيْهِ خُطَىً مَشَاهَا
        sigpic

        Comment


        • #5
          رد: مشكلتنا مع الاعياد و العطل الرسمية

          بالمناسبة ياعزيزي السني الشباب ديل كلهم كبروا فجأة فجمال عمر مثلا أنا بعد مرات بدعك عيوني أشعر بأن الذي أمامي ليس جمال الذي كان قبل يومين شعره أسود وضعيفوني الواحد يخاف عليه بنكسر وأيمن وأشرف مأمون فكلهم أولاد صغار فما تغشك أشكالهم فالمظاهر خداعة الكبير الوحيد هو فلان والحمد لله إتخارج فما تزعلوا ياشباب لكن أنا أخوكم الكبير وشايفكم قدامي مازلتوا شباب صغار وبرضوا ياموني ماتسمع الكلام ده وتقول 10 سنوات أنا مازلت على رائي 15 يوم فقط ( 29 / 10 / 2009 ) إن شاء الله ،، أبو بهلول .
          سترك وعفوك ورضاك يا رب العالمين

          Comment


          • #6
            رد: مشكلتنا مع الاعياد و العطل الرسمية

            المشاركة الأصلية كتبت بواسطة عصام نوح مشاهدة المشاركة
            بالمناسبة ياعزيزي السني الشباب ديل كلهم كبروا فجأة فجمال عمر مثلا أنا بعد مرات بدعك عيوني أشعر بأن الذي أمامي ليس جمال الذي كان قبل يومين شعره أسود وضعيفوني الواحد يخاف عليه بنكسر وأيمن وأشرف مأمون فكلهم أولاد صغار فما تغشك أشكالهم فالمظاهر خداعة الكبير الوحيد هو فلان والحمد لله إتخارج فما تزعلوا ياشباب لكن أنا أخوكم الكبير وشايفكم قدامي مازلتوا شباب صغار وبرضوا ياموني ماتسمع الكلام ده وتقول 10 سنوات أنا مازلت على رائي 15 يوم فقط ( 29 / 10 / 2009 ) إن شاء الله ،، أبو بهلول .
            شكرا ياعصام على رفع المعنويات للشباب لكن حددتها مع مونى
            رَبِّ اغْفِرْ لِيَّ وَلِوَالِدَيَّ رَبِّ ارْحَمْهُمَا كَمَا رَبَّيَانِيْ صَغِيْرَا

            Comment


            • #7
              رد: مشكلتنا مع الاعياد و العطل الرسمية

              الحمد لله السني إقتنع بكلامي وحول موضوع أيمن الى منتديات الشباب وعندي إحساس لو إجتهدت أكثر سيحولوه للبراعم ربنا يستر ،، مع تحياتي أبو بهلول .
              سترك وعفوك ورضاك يا رب العالمين

              Comment


              • #8
                رد: مشكلتنا مع الاعياد و العطل الرسمية

                مالك ياعصام ومال جمال عمر !!!! حسع هو هبشك بكلمة ؟ ياناس خلوا أولاد أمدرمان في حالهم وهم بعرفوا يدبروا أمرهم ، ولا شنو يجماعة .

                Comment


                • #9
                  رد: مشكلتنا مع الاعياد و العطل الرسمية

                  أولا عصام
                  المشاركة الأصلية كتبت بواسطة عصام نوح مشاهدة المشاركة
                  الحمد لله السني إقتنع بكلامي وحول موضوع أيمن الى منتديات الشباب وعندي إحساس لو إجتهدت أكثر سيحولوه للبراعم ربنا يستر ،، مع تحياتي أبو بهلول .
                  ياخوي أيمن الصادق أصلاً كتب الموضوع ده في منتدى الشباب،، السؤال هو،،، إنت الجابك هنا شنو عشان ترد على أيمن؟؟

                  المشاركة الأصلية كتبت بواسطة محمد عثمان الحاج يوسف مشاهدة المشاركة
                  مالك ياعصام ومال جمال عمر !!!! حسع هو هبشك بكلمة ؟ ياناس خلوا أولاد أمدرمان في حالهم وهم بعرفوا يدبروا أمرهم ، ولا شنو يجماعة .
                  مالك يا محمد عثمان عاوز تجيب لينا عمار وسيرة البحر المغرق المنتدى ده؟؟
                  مَشَيْنَاهَا خُطَىً كُتِبَتْ عَلَيْنَا وَمَنْ كُتِبَتْ عَلَيْهِ خُطَىً مَشَاهَا
                  sigpic

                  Comment


                  • #10
                    رد: مشكلتنا مع الاعياد و العطل الرسمية

                    المشاركة الأصلية كتبت بواسطة محمد عثمان الحاج يوسف مشاهدة المشاركة
                    مالك ياعصام ومال جمال عمر !!!! حسع هو هبشك بكلمة ؟ ياناس خلوا أولاد أمدرمان في حالهم وهم بعرفوا يدبروا أمرهم ، ولا شنو يجماعة .
                    يا محمد عثمان أولاد أمدرمان على العين والرأس لكن جمال عمر دا من أولاد توتي بس الظروف سكنتو أمدرمان لكن أهله وجذوره ضاربه في عمق التاريخ في توتي الباسلة وأسرته من أشهر الأسر بتوتي وأعرقها ويكفي فقط أن أبوه هو عمر عبدالرحمن خالد إبن أخ الزعيم مصطفى خالد مؤسس توتي الحديثة وزعيمها الذي لا يشق له غبار وارتبطت توتي بأمدرمان أيام المهدية حيث أتخذتها الدولة المهدية مقراً لورشة تصنيع السلاح وبها حي حتى اليوم يسمى حي الورشة وبها حوش الأمانة والطابية المقابلة النيل .. وأولاد أمدرمان أحب الناس إلى قلوبنا لكن أولادنا ديل نحن خاتين عيننا عليهم خاصة إنهم بقوا على أبواب زواج
                    اللهم استرنا فوق الأرض وتحت الأرض ويوم العرض .. آمين

                    Comment


                    • #11
                      رد: مشكلتنا مع الاعياد و العطل الرسمية

                      قبل ما تستعجلوا أولا أنا مولود ومقيم حتي جيت مسقط بام درمان وأهلي حتي الجد السابع عشر من أم درمان للأب والأم وأجيب ليكم من الآخر أهلي ناس أحمد شرفي ( المقابر ) أي تجاوزات أخرى حندفعكم على مواتاكم وأعملوا حسابكم الناس ورثوا عمارات نحنا ورثنا مقابر والحمد لله ،، وجمال عمر وكما واضحت من تعليقي بعرفه من زمن كان شافع وبعرف أهله وهو أخي الصغير وأنا لم أقل أي شيء في حقه بل قلت حقيقة ووضحتها للسني والذي إنسحب من معركة كرري هذه ،، مع تحياتي للجميع وبالأخص الأمدرمانيين العظماء ،، ( أمدرماني قح ) ،، أبو بهلول .
                      Last edited by عصام نوح; 2nd November 2009, 05:56 PM.
                      سترك وعفوك ورضاك يا رب العالمين

                      Comment


                      • #12
                        رد: مشكلتنا مع الاعياد و العطل الرسمية

                        ذكرتني يا عصام واحد زمان من أمدرمان جاءته ليلة القدر وكان داير يقول يارب الغني لي جنى الجنى (يقصد الثراء) ولكنه قال بدلا من ذلك : يارب الغناء لي جنى الجنى فطلعت كل الأسرة فنانين ومطربين وعازفين

                        وكويس أنك ورثتم مقابر إيه رايك أنو نحن في توتي ما عندنا مقابر أصلا وندفن في مقابر حلة حمد حتى اليوم وعندنا واحد من توتي رحل وسكن في حلة حمد بعدين كل يوم يقولوا ليهو خالتك عيانة في توتي تعال شوفها بكرة بت عمتك عرسها باكر تعال توتي وهكذا قام قال والله توتي دي بعد ما الواحد رحل منها ومشى حلة حمد ما ريحانا كل يوم ماشين توتي .. واحد من ناس توتي قال ليهو أنت لأنك حلة حمد دي مشيتها براك بي كرعيك لكن والله لو كنا وديناك نحن لي حلة حمد دي ما كنت رجعت تاني مدى الحياة ..
                        Last edited by عمار محجوب محمد زكي; 3rd November 2009, 09:52 AM.
                        اللهم استرنا فوق الأرض وتحت الأرض ويوم العرض .. آمين

                        Comment


                        • #13
                          رد: مشكلتنا مع الاعياد و العطل الرسمية

                          يا أخواننا موني وينو زاتو .. كبستوهو كبس لمن شرد
                          ههههههههههههههه

                          Comment

                          Working...
                          X